waso suno
mi jan sona lawa ala. mi toki e pilin taso. mi wile e ni: pilin mi li tan sona. taso sona li ken lon ala. sina wile e sona lon la o alasa e jan sona. lawa li ken ante a lon ma ante.
taso. pilin mi la lipu lawa pi pana ken li ken lon toki ale.
lipu pi pana ken li “lipu esun” lon nasin pi lawa ma. lipu esun li seme? jan mute li wile esun e ijo, li pana wawa e wile wan, la wile ni li kama lawa wawa. (lawa li wawa ni: jan wan li pakala e lawa la jan ante li ken utala e jan pakala kepeken nasin lawa li ken kama e ijo pona wile.) lipu pi pana ken la esun li ni:
- mi pana e ni: sina ken ante e lipu.
- sina pana e ni: sina ante e lipu la nasin sama li lawa e ante sina.
taso, mi pana taso e lipu la, sina lon ala. wawa pi lipu esun li wile e ni anu seme: mi en sina li kama wile wan. taso mi en sina li toki ala la ni li kama lon tenpo seme? lon tenpo pi wile sina. mi pana e wile la sina wile e sama la esun li lon. taso sina wile ala la seme? ijo ante ala li ken e ni: sina ante e lipu. sina wile ala e esun ni li awen ante e lipu la ni li pakala lon nasin ante.
taso jan li ken wan e wile li ken pana e wile wan lon nasin mute a. ni taso li suli: jan ale li wile sama lon tenpo wan. jan li ken toki e wile kepeken toki Inli kepeken toki pona kepeken toki ale. jan li ken sitelen e lawa wile lon lipu li ken toki taso. ni li suli ala. jan ale li kama e esun wile sama la wile li lawa.
toki ale o ken tan ni: jan esun li ken tan ma ante li ken lipu e esun kepeken toki ante. jan esun li wile e ni: lipu ona li lawa lon ma ale.
—
taso, lawa pi lipu esun li lon la, jan esun li ken ala utala kepeken ona la, lawa li pona ala! ni li sama ni: lawa li lon ala! mi o alasa e ni: lipu pi lawa esun li toki pona la utala li kama la lawa lipu li ken ala ken suli lon utala.
utala pi nasin lawa la jan lawa utala li lon. pali ona li ni: ona o kute e ale o toki e ni: lawa seme li lon? jan seme li pakala seme e lawa? ona o pana e seme tan ni?
lipu li toki pona la ni li ken ike: jan lawa li ken sona ala e ni: lawa seme li lon? ni la ona li ken wile e ni: ona li lukin e lipu sama pi toki ona. ma Mewika la toki Inli anu seme. taso mi utala e sina kepeken lipu la, mi ken pona e ni kepeken nasin ni: mi alasa e jan pi ante toki. mi pana e mani tawa ona la ona li pana e lipu sama pi toki Inli. ona li toki e ni kin: sona ale mi la lipu tu li toki e ijo sama. ni la jan lawa utala li ken lukin. ale li pona.
ni la, sina lipu e esun li pana e ken kepeken toki pona la, o wile e ni: jan pi ante toki li lukin lon tenpo kama la ona li sona pona e wile sina li ken toki e wile sama a lon toki Inli.
—
NI LI SULI MUTE, MI LUKIN ALA
- lipu lawa li ken lon toki ale. tan ni: jan esun pi ma ante li kepeken toki ante li wile e ni: lipu ona li ken lawa lon ma ale.
- lipu lawa pi toki ante nasa li ken lawa lon utala lon nasin ni: jan pi ante toki li ken pana e sona pona tawa jan lawa utala.
- o wile e ni: jan ni pi ante toki li lukin e lipu sina la ona li sona e wile sina.
toki pini mi la, o pali a e ni! mi wile lukin e ni: tenpo kama la utala pi nasin lawa la toki pona li suli. ni li musi mute tawa mi.
(ni li ken kama lon nasin ante ni: jan tu li moli e jan li toki e pali ni kepeken toki pona. taso, o kama ala e ni.)
