o lukin e ni: waso li moli la ona li tawa ma. ona li tawa ma la pipi li moku e ona. pipi li kama suli la waso li moku e ona. ni la waso en pipi li esun.
sina ken pilin sama ni: moli li pini. taso pilin mi la moli li pini ala. ala li pini a tan ni: ale li esun sama esun waso pipi.
pini ale li ken pilin monsuta tawa mi. taso mi kama sona e esun la mi ken pona e pilin. pini li pini ala e ijo li ante e ona tawa ijo ante taso. ante ni li ken suli li ken monsuta taso ale li awen lon li kama ante taso.
nasin sewi mi la sona esun li wawa li suwi e pilin mute. pilin ike li ken kama pilin pona anu pilin eliki.
mi kule. kule mi li ni: mi meli. taso ijo ante li mije e mi. mi alasa mije la pilin ale li nasa ike. mi meli la pona li ken kama tawa mi. nasin kule mi li esun. mi esun e mije mi li meli. mi esun e nimi ike mi pi tenpo weka li waso suno Salinsen. mi esun e sijelo mi kepeken misikeke ante li sijelo sin.
taso jan lawa li toki ike e esun pona mi. esun nimi la ona li wile e mani mute e tenpo mute. esun sijelo kin la ona li wile e mani mute tan mi. mi awen esun ni la mi pilin pona. taso mi lukin e poki misikeke mi la mi pilin eliki tan ni: misikeke li pona li lon insa. taso nimi pi tenpo weka li ike li lon selo.
ni la poki li eliki. mi awen moku e misikeke insa la mi wile ala jaki e poki. taso nimi ike li awen lon selo la mi wile ala awen jo. mi o esun. taso esun pona li seme?
ni la mi ni tan pilin: mi weka e nimi tan selo. mi pali e lipu lili tawa ni: ona li kama sama suno lili tawa lukin. mi pana e sitelen tawa suno lipu. mi pana e suno lipu tawa poki. poki li kama ijo sin li esun pona. eliki poki li kama eliki pona li pini eliki ike.
sitelen lipu li mun li pipi mun. pipi mun li ni: ona li olin e mun li sona e nasin waso ona tan suno mun. suno mun li esun ni: ona li kama walo li kama pimeja li tawa sike. ni la mi pana e sitelen pi sinpin mun ale tawa lipu. pipi mun li esun ni: noka waso ona li open li pini la ona li ken tawa kon li ken waso. mi sitelen e ni kin
ale la mi pana e sitelen esun mute tawa lipu li pana e pilin mute mi tawa poki ni. tenpo weka la selo poki li toki e toki ike pi jan lawa. tenpo lon la pilin poki li toki e toki pona mi pi kule mi li toki e nasin sewi mi kin.
